लांजा :
लांजा तालुक्यातील गरीब, गरजू आणि मूत्रपिंडाच्या आजाराने त्रस्त असलेल्या रुग्णांसाठी दिलासादायक बातमी समोर आली आहे. बंद होण्याच्या मार्गावर असलेले लांजा येथील डायलिसिस सेंटर आमदार किरण (भैय्या) सामंत यांच्या हस्तक्षेपानंतर पुन्हा सुरू झाले आहे. त्यामुळे नियमित डायलिसिसवर अवलंबून असलेल्या रुग्णांना मोठा दिलासा मिळाला असून, तालुक्यातील नागरिकांकडून आमदार किरण सामंत यांचे आभार मानले जात आहेत.
मूत्रपिंड निकामी झालेल्या रुग्णांसाठी डायलिसिस ही अत्यंत महत्त्वाची आणि नियमितपणे घ्यावी लागणारी वैद्यकीय सेवा आहे. आठवड्यातून ठरावीक वेळा डायलिसिसची आवश्यकता असल्याने ही सुविधा स्थानिक पातळीवर उपलब्ध असणे रुग्णांसाठी अत्यंत गरजेचे आहे.
लांजा येथील डायलिसिस सेंटर बंद होण्याची परिस्थिती निर्माण झाल्याने रुग्ण आणि त्यांच्या नातेवाईकांमध्ये चिंतेचे वातावरण होते. सेंटर बंद झाल्यास रुग्णांना रत्नागिरी किंवा अन्य ठिकाणी जाऊन डायलिसिस घ्यावे लागले असते. त्यामुळे अतिरिक्त प्रवासाचा खर्च, वेळ आणि आजारी रुग्णांना होणारा शारीरिक त्रास वाढण्याची शक्यता होती.
ही बाब आमदार किरण सामंत यांच्या निदर्शनास आल्यानंतर त्यांनी तातडीने या विषयात लक्ष घातले. रुग्णांच्या आरोग्याशी संबंधित प्रश्न असल्याने डायलिसिस सेंटर बंद राहणे योग्य नसल्याची भूमिका त्यांनी घेतली. रुग्णांना वाऱ्यावर सोडले जाणार नाही, असा स्पष्ट संदेश संबंधित यंत्रणेला देण्यात आला. त्यांच्या हस्तक्षेपानंतर लांजा येथील डायलिसिस सेंटर पुन्हा सुरू झाले असून, रुग्णांना पूर्ववत उपचार मिळण्याचा मार्ग मोकळा झाला आहे.
रुग्णांच्या आरोग्याशी तडजोड खपवून घेतली जाणार नाही
या प्रकरणातून आमदार किरण सामंत यांनी आरोग्य सुविधांबाबत आपली भूमिका स्पष्ट केली आहे. विकासकामांसोबतच सर्वसामान्य नागरिकांना आवश्यक असलेल्या आरोग्य सुविधा अखंडितपणे उपलब्ध राहणे गरजेचे असल्याचे त्यांनी स्पष्ट केले आहे.
लांजा-राजापूर-संगमेश्वर विधानसभा मतदारसंघातील रुग्णांना आरोग्य सुविधांच्या अभावामुळे त्रास होऊ नये, यासाठी आवश्यक त्या उपाययोजना केल्या जातील, अशी भूमिका यावेळी व्यक्त करण्यात आली. रुग्णांना आवश्यक उपचार मिळण्यात कोणताही अडथळा निर्माण होऊ नये, यासाठी संबंधित यंत्रणांनी रुग्णांच्या आरोग्याला सर्वोच्च प्राधान्य द्यावे, असा संदेशही देण्यात आला.
नागरिकांकडून समाधान व्यक्त
डायलिसिस सेंटर पुन्हा सुरू झाल्यामुळे लांजा तालुक्यातील रुग्ण आणि त्यांच्या कुटुंबीयांना मोठा आधार मिळाला आहे. विशेषतः आर्थिकदृष्ट्या दुर्बल कुटुंबांसाठी तालुक्याच्या ठिकाणी डायलिसिसची सुविधा उपलब्ध असणे अत्यंत महत्त्वाचे आहे.
आमदार किरण सामंत यांनी वेळीच लक्ष घालून हा प्रश्न मार्गी लावण्यासाठी हस्तक्षेप केल्याबद्दल नागरिकांकडून समाधान व्यक्त करण्यात येत आहे. डायलिसिससारखी अत्यावश्यक आरोग्य सेवा कोणत्याही परिस्थितीत बंद पडू नये, अशी अपेक्षाही नागरिकांनी व्यक्त केली.
यावेळी तालुका प्रमुख गुरुप्रसाद देसाई, लल्या कुरूप, बाबा भिंगार्डे आणि सचिन भिंगार्डे यांनी संबंधित कर्मचाऱ्यांचे आभार मानले.