चिपळूण :
राजकारणातील मतभेद बाजूला ठेवून मैत्री आणि माणुसकीची नाती जपण्याचा संदेश देणारा दिवाळी स्नेहमेळावा चिपळूण येथे उत्साहात पार पडला. आमदार भास्कर जाधव यांच्या निवासस्थानी आयोजित करण्यात आलेल्या या स्नेहमेळाव्यात विविध राजकीय व सामाजिक क्षेत्रातील मान्यवर सहभागी झाले.
दरवर्षी दिवाळी पाडव्याच्या दिवशी आयोजित करण्यात येणाऱ्या ‘फराळ स्नेहबंध’ या उपक्रमाचे यंदाही आयोजन करण्यात आले होते. भास्कर जाधव यांच्या ४३ वर्षांच्या राजकीय आणि सामाजिक प्रवासात विविध टप्प्यांवर साथ देणारे सहकारी, मित्रपरिवार आणि कुटुंबीय या निमित्ताने एकत्र आले.
या स्नेहमेळाव्यात राष्ट्रवादी काँग्रेसचे आमदार शेखर निकम यांच्यासह विविध राजकीय व सामाजिक क्षेत्रातील मान्यवरांनी उपस्थिती लावली. सर्वांनी एकत्रितपणे दिवाळी फराळाचा आनंद घेत जुन्या आठवणींना उजाळा दिला.
राजकीय व्यासपीठावर विचारधारा आणि भूमिका वेगवेगळ्या असल्या, तरी वैयक्तिक नात्यांमधील जिव्हाळा आणि आपुलकी कायम राहू शकते, याची प्रचिती या स्नेहमेळाव्यातून आली. दिवाळी फराळाच्या निमित्ताने स्नेहबंध अधिक दृढ करण्याचा हा उपक्रम उपस्थितांसाठी आनंददायी ठरला.
