रत्नागिरी / लांजा:
आपल्या शांत, मनमिळाऊ आणि अत्यंत दिलदार स्वभावाने सर्वांची मने जिंकणारे ज्येष्ठ पत्रकार, सामाजिक कार्यकर्ते तथा कोकण बँकेचे संचालक जावेद मुजावर (वय ६६) यांचे दुःखद निधन झाले. एक सच्चा, प्रेमळ आणि अत्यंत नेक माणूस गमावल्यामुळे रत्नागिरीसह संपूर्ण कोकणातील पत्रकारिता, सहकार आणि सामाजिक क्षेत्रातून तीव्र हळहळ व्यक्त केली जात आहे.
जावेद मुजावर हे शिरगाव ग्रामपंचायतीच्या सरपंच फरीदा काझी आणि कोकण बँकेचे संचालक दिलीप मुजावर यांचे बंधू होत. एस.टी. महामंडळाच्या सेवेतून निवृत्त झाल्यानंतरही त्यांनी सामाजिक व सहकार क्षेत्रात स्वतःला पूर्णपणे झोकून दिले होते. गेल्या अनेक वर्षांपासून ते कोकण बँकेचे संचालक म्हणून जबाबदारी पार पाडत होते.
पत्रकारितेत उल्लेखनीय योगदान
सामाजिक भान आणि पत्रकारितेची विशेष आवड असलेल्या मुजावर यांनी रत्नागिरी जिल्ह्यातील प्रसिद्ध ‘केटीव्ही न्यूज’ (KTV News) या वृत्तवाहिनीसाठी पत्रकार म्हणून दीर्घकाळ काम केले. आपल्या लेखणीच्या व कामाच्या माध्यमातून त्यांनी सर्वसामान्य नागरिकांचे प्रश्न मांडले. त्यांच्या शांत, संयमी व मदत करणाऱ्या वृत्तीमुळे पत्रकारिता क्षेत्रातील सहकाऱ्यांपासून ते विविध क्षेत्रांतील मान्यवरांपर्यंत सर्वांशीच त्यांचे जिव्हाळ्याचे आणि कौटुंबिक संबंध निर्माण झाले होते.
सर्वत्र शोकाकूल वातावरण
त्यांच्या पश्चात पत्नी, मुलगा, भाऊ, बहिणी असा मोठा परिवार आहे. एका नेक आणि दिलदार मार्गदर्शकाच्या जाण्याने मुजावर कुटुंबीयांवर दुःखाचा डोंगर कोसळला आहे. त्यांच्या निधनाची बातमी समजताच विविध राजकीय, सामाजिक व पत्रकारिता क्षेत्रातील दिग्गजांनी त्यांना भावपूर्ण श्रद्धांजली अर्पण केली.
जावेद मुजावर यांचा अंत्यविधी (दफन) त्यांच्या लांजा येथील मूळ निवासस्थानी संपन्न होणार आहे.
