रत्नागिरीत इंधन टंचाईचा फटका; कडाक्याच्या उन्हात महिलांचे हाल, स्वतंत्र रांगेची मागणी जोर धरतेय!

रत्नागिरी:
जिल्ह्यात सध्या पेट्रोल आणि डिझेलच्या टंचाईने सर्वसामान्यांचे कंबरडे मोडले आहे. ही टंचाई राष्ट्रीय स्तरावरील इंधनाच्या अभावामुळे नसून, तेल कंपन्यांची नवी ‘आगाऊ पेमेंट’ प्रणाली आणि विस्कळीत झालेली पुरवठा साखळी या तांत्रिक कारणांमुळे ओढवली असल्याचे समोर आले आहे. मात्र, या गोंधळाचा सर्वाधिक फटका रत्नागिरीतील महिलांना बसत असून, पेट्रोल पंपांवरील चित्र अत्यंत हृदयद्रावक आहे.

लहान मुलांसह उन्हात तासनतास प्रतीक्षा
शहरातील पेट्रोल पंपांवर सध्या वाहनांच्या लांबच लांब रांगा पाहायला मिळत आहेत. यात अनेक महिला आपल्या लहान मुलांना सोबत घेऊन रणरणत्या उन्हात तासनतास उभ्या असलेल्या दिसत आहेत. “पेट्रोल पंप चालकांना या महिलांची आणि लहान मुलांची दया येत नाही का?” असा संतप्त सवाल आता विचारला जात आहे. दुपारच्या कडाक्याच्या उन्हात रांगेत उभे राहिल्याने महिलांच्या आरोग्याचा प्रश्नही निर्माण होत आहे.

रात्रीची असुरक्षितता आणि घरची ओढ
केवळ दिवसाच नव्हे, तर रात्रीच्या वेळीही पेट्रोलसाठी या रांगा संपण्याचे नाव घेत नाहीत. रात्री उशिरापर्यंत रांगेत अडकून पडावे लागत असल्याने महिलांना घरी पोहोचण्यास विलंब होत आहे. कामावरून सुटल्यानंतर किंवा घरची कामे आटोपून पेट्रोलसाठी तासनतास ताटकळत राहिल्यामुळे महिला वर्गात मोठी अस्वस्थता पसरली आहे.

‘ती’ स्वतंत्र रांग गेली कुठे?
रत्नागिरीत यापूर्वी अनेक पेट्रोल पंपांवर महिलांसाठी स्वतंत्र रांगेची (Queue) व्यवस्था होती. त्यामुळे महिलांना जलद गतीने पेट्रोल मिळायचे आणि गर्दीचा त्रास व्हायचा नाही. मात्र, आता ही व्यवस्था मोडीत निघाल्याचे चित्र आहे. “पूर्वी महिलांसाठी वेगळी लाईन होती, मग आताच ती का बंद करण्यात आली?” असा सवाल रत्नागिरीतील महिला नागरिक उपस्थित करत आहेत.

महत्त्वाची मागणी
पेट्रोल पंप चालकांनी माणुसकीच्या दृष्टिकोनातून महिलांसाठी तातडीने स्वतंत्र रांग सुरू करावी, जेणेकरून लहान मुलांसह उन्हात उभ्या राहणाऱ्या मातांची आणि रात्री उशिरापर्यंत ताटकळणाऱ्या महिलांची या त्रासातून सुटका होईल. प्रशासनानेही याकडे गांभीर्याने लक्ष देणे गरजेचे आहे.