शिष्यवृत्तीतील यश म्हणजेच शाळा गुणवत्तेचा खरा आरसा! प्रा. सुधाकर मुरकुटे यांचे प्रतिपादन

रत्नागिरी (विशेष प्रतिनिधी):
“एखाद्या शाळेचे विद्यार्थी शिष्यवृत्ती परीक्षेत गुणवत्ता यादीत येणे म्हणजे ती शाळा गुणवत्तापूर्ण असल्याचे द्योतक आहे. त्यामुळे सर्व शिक्षकांनी विद्यार्थ्यांमध्ये मूल्यसंवर्धनासोबतच उच्च दर्जाची गुणवत्ता निर्माण करण्यासाठी सातत्याने प्रयत्न करावेत,” असे प्रतिपादन रत्नागिरी नगरपरिषद शिक्षण मंडळाचे प्रशासन अधिकारी प्रा. सुधाकर मुरकुटे यांनी केले.
     नगरपरिषद शिक्षण मंडळाच्या सर्व शिक्षकांसाठी शहरातील दामले विद्यालयात आयोजित ‘शिष्यवृत्ती मार्गदर्शन व मूल्यवर्धन कार्यशाळेत’ ते बोलत होते. या प्रसंगी व्यासपीठावर दामले विद्यालयाचे मुख्याध्यापक व केंद्र समन्वयक श्री. भगवान मोटे, श्री. संदीप कांबळे, तसेच मार्गदर्शक शिक्षक श्री. रविंद्र शिंदे, श्री. योगेश कदम आणि सौ. वर्षा म्हादे उपस्थित होते.
यशासाठी ‘नियोजन, सातत्य अन् परिश्रम’
कार्यक्रमाच्या प्रास्ताविकात श्री. भगवान मोटे यांनी दामले विद्यालयाच्या वाढत्या पटसंख्येचा आलेख मांडला. शाळेच्या या यशात शिष्यवृत्ती परीक्षेतील कामगिरीचा मोठा वाटा असल्याचे सांगत, “नियोजन, सातत्य आणि परिश्रम या त्रिसूत्रीच्या जोरावर नगरपरिषद शाळांमधून जास्तीत जास्त विद्यार्थी गुणवत्ताधारक घडवूया,” असा संकल्प त्यांनी व्यक्त केला.
     यावेळी शिष्यवृत्तीधारक विद्यार्थ्यांच्या मार्गदर्शक शिक्षकांचा तसेच यावर्षीचा ‘आदर्श शिक्षक पुरस्कार’ प्राप्त शिक्षकांचा प्रशासन अधिकारी प्रा. मुरकुटे यांच्या हस्ते विशेष गौरव करण्यात आला.
तज्ज्ञ शिक्षकांचे मोलाचे मार्गदर्शन
पाया मजबूत करण्यावर भर: सौ. वर्षा म्हादे (नगरपरिषद शाळा क्र. १९, आंबेशेत) यांनी आपल्या शाळेतील तीन विद्यार्थी गुणवत्ता यादीत येण्यामागील यशाचे रहस्य उलगडले. शिष्यवृत्तीचा पाया इयत्ता पहिलीपासूनच मजबूत करण्यासाठी विद्यार्थ्यांना बाह्य स्पर्धा परीक्षांना बसवण्याचा आग्रह त्यांनी धरला.
     गणित विषयातील सोप्या क्लृप्त्या: श्री. रवींद्र शिंदे यांनी गणित विषयावर मार्गदर्शन करताना, विद्यार्थी सराव करताना होणाऱ्या चुका कशा टाळू शकतात आणि त्यांचा आत्मविश्वास कसा वाढवता येईल, यावर प्रकाश टाकला.
बुद्धिमत्ता चाचणीची हसत-खेळत तयारी: श्री. योगेश कदम यांनी बुद्धिमत्ता विषयातील कूटप्रश्न आणि कठीण घटक हसत-खेळत सोप्या पद्धतीने कसे सोडवावेत, याचे प्रात्यक्षिक दिले.
     कार्यक्रमाचे सूत्रसंचालन श्री. प्रशांत मांडवकर यांनी केले, तर राष्ट्रगान ‘वंदे मातरम’ने कार्यशाळेची सांगता झाली.