रत्नागिरीच्या क्रिकेट वैभवात मानाचा तुरा; ‘कै. छोटू देसाई क्रिकेट ॲकॅडमी’च्या तिसऱ्या ॲस्ट्रो टर्फचे दिमाखात उद्घाटन!

रत्नागिरीत क्रिकेटची पंढरी बहरतेय! कै. छोटू देसाई ॲकॅडमीत तिसऱ्या टर्फचे उद्घाटन

रत्नागिरी:
रत्नागिरीतील क्रिकेटला नवी उंची देणाऱ्या ‘कै. छोटू देसाई क्रिकेट ॲकॅडमी’ च्या शिरपेचात आणखी एक मानाचा तुरा रोवला गेला आहे. छत्रपती शिवाजी स्टेडियमच्या मैदानालगत या ॲकॅडमीच्या तिसऱ्या ‘ॲस्ट्रो टर्फ’ चे लोकार्पण नुकतेच अत्यंत उत्साही वातावरणात पार पडले. या सुसज्ज टर्फमुळे स्थानिक खेळाडूंना आता आंतरराष्ट्रीय दर्जाच्या सरावाची संधी मिळणार आहे.

कार्यक्रमाचे प्रमुख पाहुणे लांजा-राजापूरचे लोकप्रिय आमदार आणि रत्नागिरी जिल्हा क्रिकेट असोसिएशनचे अध्यक्ष ना. श्री. किरणजी सामंत यांचे आगमन होताच फटाक्यांच्या आतषबाजीने त्यांचे जंगी स्वागत करण्यात आले. यावेळी मंगलमूर्ती प्रतिष्ठानच्या अध्यक्षा सौ. उर्मिलाताई घोसाळकर, उद्योजक श्री. सुरेशशेठ गुंडेचा, सह्याद्री दूरदर्शनचे श्री. जयू भाटकर, नगरसेवक बाळू साळवी, श्री. बिपीन बंदरकर, श्री. सौरभ मलुष्टे, सौ. पूजाताई पवार आणि वानखेडे स्टेडियमचे क्युरेटर श्री. मधुकर बोथले यांची प्रमुख उपस्थिती होती.

२५ वर्षांचे सातत्य आणि कष्टाचे फळ
ॲकॅडमीचे अध्यक्ष श्री. गजेंद्रशेठ पाथरे आणि सचिव श्री. दीपक देसाई यांनी सर्व पाहुण्यांचे शाल व श्रीफळ देऊन स्वागत केले. यावेळी बोलताना दीपक देसाई यांनी सांगितले की, “गेली २५ वर्षे ही संस्था रत्नागिरीतील शालेय खेळाडूंना घडवण्याचे काम करत आहे. यापूर्वी दोन टर्फ उपलब्ध होते, त्यात आता तिसऱ्या आधुनिक टर्फची भर पडली आहे.” ७ अनुभवी प्रशिक्षकांद्वारे येथे शास्त्रशुद्ध प्रशिक्षण दिले जात असल्याने रत्नागिरीच्या क्रिकेटचा दर्जा उंचावण्यास मदत होत आहे.

दानशूर हातांची साथ
हे आधुनिक ॲस्ट्रो टर्फ साकारण्यासाठी रत्नागिरीतील दानशूर उद्योजक श्री. सुरेशशेठ गुंडेचा, श्री. गजेंद्रशेठ पाथरे, राजेश खातू, किशोर भुते, सौरभ मलुष्टे आणि राजू शेठ खातू यांनी मोलाचे सहकार्य केले. या टर्फचे उद्घाटन आमदार किरणजी सामंत आणि सौ. उर्मिलाताई घोसाळकर यांच्या हस्ते फित कापून, तर श्री. सतीश साळवी यांच्या हस्ते श्रीफळ वाढवून करण्यात आले.

गुणी खेळाडूंचा गौरव
या सोहळ्याचे खास आकर्षण म्हणजे ॲकॅडमीतून जिल्ह्यासाठी निवड झालेल्या खेळाडूंचा सत्कार!
* १४ वर्षांखालील संघ: आराध्य मोंडकर, वेद बाणे, स्मित घाडगे.
* १९ वर्षांखालील व खुला गट: कुणाल गावडे, अफसान मिरकर, अनिश भाटकर, वेदांत पवार, किरण सुर्वे, पार्थ गांधी आणि अभिषेक पवार.
* महिला संघ: सानिया महाकाळ, दर्शना पवार, सौ. वर्षा ढवळे.
* १२ वर्षांखालील उदयोन्मुख खेळाडू: सिद्धार्थ सावंत, रुद्र खातू, शिवराज यांचाही सन्मान करण्यात आला.
कार्यक्रमाचे नेटके सूत्रसंचालन श्री. संजय वैशंपायन यांनी केले. हा कार्यक्रम यशस्वी करण्यासाठी दिवाकर मयेकर, बलराम कोतवडेकर, लाल्या खातू, राजीव सावंत यांच्यासह अनेक सदस्यांनी परिश्रम घेतले. मोठ्या संख्येने उपस्थित असलेले खेळाडू आणि पालकांमुळे या सोहळ्याला एक वेगळीच रंगत आली होती.