रत्नागिरीतील फुरूस गावच्या सुपुत्राचा ऑस्ट्रेलियात डंका; शाकिर तिसेकर यांनी ‘आर्टिफिशियल इंटेलिजन्स’मध्ये मिळवली उच्च पदवी!

खेड (प्रतिनिधी): तालुक्यातील फुरूस गावातील रहिवासी शाकिर हिशामउद्दीन तिसेकर यांनी शिक्षणाच्या क्षेत्रात उत्तुंग भरारी घेतली आहे. ऑस्ट्रेलियातील प्रतिष्ठित ‘युनिव्हर्सिटी ऑफ टेक्नॉलॉजी सिडनी’ (UTS) मधून त्यांनी आर्टिफिशियल इंटेलिजन्स (AI) या अत्याधुनिक विषयात ‘हायर फर्स्ट क्लास’ श्रेणीत पदव्युत्तर पदवी (Masters Degree) प्राप्त केली आहे. त्यांच्या या यशामुळे फुरूस गावाच्या शिरपेचात मानाचा तुरा रोवला गेला असून, संपूर्ण खेड तालुक्यातून त्यांचे अभिनंदन होत आहे.
शैक्षणिक प्रवासाचा टप्पा:
शाकिर तिसेकर यांचे प्राथमिक आणि माध्यमिक शिक्षण मुंबईतील कुर्ला येथील ‘होली क्रॉस हायस्कूल’मध्ये झाले. शालेय शिक्षणापासूनच अभ्यासात हुशार असलेल्या शाकिर यांनी पुढील शिक्षणासाठी तंत्रज्ञानाची निवड केली. त्यांनी बेलापूर येथील भारती विद्यापीठातून कॉम्प्युटर टेक्नॉलॉजीमध्ये डिप्लोमा पूर्ण केला. त्यानंतर कॉम्प्युटर सायन्स अँड इंजिनिअरिंगमध्ये ९.५ सीजीपीए (CGPA) गुण मिळवत बी.टेक. पदवी संपादन केली. याच जिद्दीच्या जोरावर त्यांनी ऑस्ट्रेलिया गाठून आर्टिफिशियल इंटेलिजन्स या भविष्यातील अत्यंत महत्त्वाच्या विषयात यश मिळवले आहे.
कुटुंबाचा मोलाचा पाठिंबा:
शाकिर यांच्या या यशामागे त्यांचे वडील हिशामउद्दीन अमीन तिसेकर आणि आई शबनम तिसेकर यांचे अनमोल मार्गदर्शन आणि प्रोत्साहन असल्याचे शाकिर यांनी सांगितले. कठीण काळातही मुलाच्या स्वप्नांना बळ देणाऱ्या आई-वडिलांच्या कष्टाचे हे फळ असल्याचे बोलले जात आहे.
गावात आनंदाचे वातावरण:
शाकिर यांच्या या जागतिक दर्जाच्या यशाबद्दल फुरूस गावच्या ग्रामस्थांमध्ये उत्साहाचे वातावरण आहे. मित्रपरिवार, नातेवाईक आणि ग्रामस्थांकडून शाकिर यांच्यावर अभिनंदनाचा वर्षाव होत आहे. आधुनिक तंत्रज्ञानाच्या क्षेत्रात खेड तालुक्याचा नाव उंचावल्याबद्दल सर्वस्तरातून शाकिर यांचे कौतुक केले जात आहे.