राष्ट्रीय सुरक्षा सल्लागार अजित डोभाल यांची भेट ठरली संस्मरणीय: उद्योग मंत्री उदय सामंत यांनी मानले डॉ. रोहित टिळक यांचे आभार

पुणे:
भारताचे राष्ट्रीय सुरक्षा सल्लागार मा. अजित डोभाल हे संपूर्ण जगासाठी एक अत्यंत कुतूहलाचे आणि आदराचे केंद्रबिंदू आहेत. अशा प्रखर देशभक्ताला प्रत्यक्ष भेटण्याची आणि संवाद साधण्याची सुवर्णसंधी राज्याचे उद्योग मंत्री उदय सामंत यांना लाभली असून, याबद्दल त्यांनी लोकमान्य टिळक स्मारक ट्रस्टचे अध्यक्ष डॉ. रोहित टिळक यांचे मनापासून आभार मानले आहेत.
‘लोकमान्य टिळक राष्ट्रीय पुरस्कार 2026’ प्रदान सोहळा
पुण्यात आयोजित करण्यात आलेल्या दिमाखदार सोहळ्यात केंद्रीय गृह व सहकार मंत्री अमित शाह यांच्या हस्ते आणि मुख्यमंत्री देवेंद्र फडणवीस यांच्या प्रमुख उपस्थितीत भारताचे राष्ट्रीय सुरक्षा सल्लागार अजित डोवाल यांना प्रतिष्ठित ‘लोकमान्य टिळक राष्ट्रीय पुरस्कार 2026’ प्रदान करण्यात आला.
     या उच्चस्तरीय सोहळ्याला राज्याचे उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, केंद्रीय राज्यमंत्री मुरलीधर मोहोळ, उच्च व तंत्रशिक्षण मंत्री चंद्रकांत पाटील, उद्योग मंत्री उदय सामंत, राज्यमंत्री माधुरी मिसाळ, आमदार रविंद्र चव्हाण, लोकमान्य टिळक स्मारक ट्रस्टचे अध्यक्ष डॉ. रोहित टिळक यांच्यासह अनेक दिग्गज मान्यवर उपस्थित होते.
मंत्री उदय सामंत यांची मनोगतातील भावना:
या महत्त्वपूर्ण भेट संदर्भात आपल्या भावना व्यक्त करताना मंत्री उदय सामंत यांनी डॉ. रोहित टिळक यांच्या प्रति कृतज्ञता व्यक्त केली आहे:
“डॉ. रोहित टिळक, तुम्हाला मनापासून धन्यवाद… तुमच्यामुळे देशासाठी आपले संपूर्ण आयुष्य समर्पित करणाऱ्या, आपल्या अतुलनीय कर्तृत्वाने शत्रूंना धडकी भरवणाऱ्या आणि एका धगधगत्या ज्वलंत राष्ट्रभक्ताला म्हणजेच मा. अजित डोभाल यांना भेटण्याची संधी मला मिळाली. अशा प्रेरणादायी व्यक्तिमत्त्वासोबत झालेला संवाद माझ्यासाठी अत्यंत संस्मरणीय आणि ऊर्जा देणारा ठरला आहे.”