‘गोकुळ’वर सतेज पाटील गटाचा ऐतिहासिक विजय; महायुतीला मोठा धक्का, १४ जागांवर मुसंडी

कोल्हापूर :
संपूर्ण राज्याचे लक्ष लागून राहिलेल्या कोल्हापूर जिल्हा सहकारी दूध उत्पादक संघाच्या (‘गोकुळ’) निवडणुकीत काँग्रेसचे ज्येष्ठ नेते सतेज पाटील यांच्या नेतृत्वाखालील ‘राजर्षी शाहू शेतकरी समविचारी आघाडी’ने ऐतिहासिक आणि देदीप्यमान विजय संपादन केला. अत्यंत अटीतटीच्या ठरलेल्या या लढतीत सतेज पाटील यांच्या कुशल रणनीतीच्या जोरावर आघाडीने तब्बल १४ जागांवर दणदणीत विजय खेचून आणत सत्ता काबीज केली, तर सत्ताधारी महायुतीच्या पॅनलला अवघ्या ११ जागांवर समाधान मानावे लागले.
अटीतटीच्या लढतीत दिग्गजांना पराभवाचा धक्का
मतमोजणीच्या सुरुवातीच्या फेऱ्यांमध्ये महायुतीने सर्वसाधारण गटात आघाडी घेत चुरस निर्माण केली होती. मात्र, पुढील फेऱ्यांमध्ये सतेज पाटील यांच्या पॅनलने जोरदार मुसंडी मारत विजयावर शिक्कामोर्तब केले. या निवडणुकीत महायुतीला प्रचंड मोठा राजकीय हादरा बसला असून, सुरुवातीला आघाडीवर असणाऱ्या शौमिका महाडिक यांच्यासह ‘गोकुळ’चे माजी अध्यक्ष अरुण डोंगळे, विश्वास पाटील आणि नाविद मुश्रीफ या मातब्बर उमेदवारांना पराभवाची धूळ चाखावी लागली. या दिग्गजांच्या पराभवामुळे महायुतीची सर्व राजकीय गणिते कोलमडली.
‘अजिंक्यतारा’वर गुलाल, फटाक्यांची आतषबाजी
निकालाचे चित्र स्पष्ट होताच कोल्हापुरातील सतेज पाटील यांच्या ‘अजिंक्यतारा’ निवासस्थानी आणि काँग्रेस कार्यालयाबाहेर कार्यकर्त्यांनी प्रचंड जल्लोष साजरा केला. ढोल-ताशांचा गजर, फटाक्यांची आतषबाजी आणि गुलालाच्या उधळणीने संपूर्ण परिसर दुमदुमून गेला.
      या ऐतिहासिक विजयानंतर सतेज पाटील यांनी कार्यकर्त्यांचे आभार मानत त्यांचे अभिनंदन केले. सहकार क्षेत्रातील या निर्णायक यशामुळे पश्चिम महाराष्ट्राच्या राजकारणात सतेज पाटील यांचे निर्विवाद वर्चस्व पुन्हा एकदा अधोरेखित झाले असून, राजकीय वर्तुळातून त्यांच्या नेतृत्वाचे मोठे कौतुक होत आहे.