रत्नागिरी: राज्यातील मत्स्यव्यवसायिकांचे जीवनमान उंचावण्यासाठी आणि मत्स्यशेतकऱ्यांना शाश्वत आर्थिक आधार मिळवून देण्यासाठी राज्य शासनाने ‘मुख्यमंत्री मत्स्यसंपदा योजना’ संपूर्ण राज्यात लागू केली आहे. या योजनेअंतर्गत मत्स्यव्यवसाय विभागाच्या लाभार्थीभिमुख २४ योजनांसाठी ‘महाडीबीटी २.०’ या संकेतस्थळावर ऑनलाइन अर्ज भरण्याची सुविधा उपलब्ध करून देण्यात आली आहे. शेती उत्पन्नातील अनिश्चिततेच्या काळात शेतकऱ्यांना, विशेषतः अल्पभूधारक शेतकऱ्यांना उत्पन्नाचा पूरक स्रोत उपलब्ध व्हावा, यासाठी जास्तीत जास्त मत्स्यशेतकरी व मच्छीमारांनी या योजनांचा लाभ घ्यावा, असे आवाहन मत्स्यव्यवसाय व बंदरे मंत्री यांनी केले आहे.
शासनाने भूजलाशयीन, निमखारे पाणी आणि सागरी मत्स्यव्यवसायाशी संबंधित विविध योजनांमध्ये सुसूत्रता आणण्यासाठी राज्य व जिल्हास्तरीय अशा एकूण २८ योजनांचा सर्वसमावेशक आढावा घेतला. यापैकी ४ राज्यस्तरीय, १८ जिल्हास्तरीय आणि सुधारित २ जिल्हास्तरीय अशा एकूण २४ योजनांसाठी ‘महाडीबीटी २.०’ प्रणालीवरून पारदर्शक व सुलभ पद्धतीने ऑनलाइन अर्ज स्वीकारले जात आहेत. प्रशासकीय प्रक्रियेचे सुलभीकरण करणे, अनावश्यक कागदपत्रांची पूर्तता कमी करून कामाला गती देणे आणि डिजिटल सेवा पुरवणे या उद्देशाने या योजनांचे पुनर्गठन करण्यात आले आहे.
या योजनांचा लाभ घेण्यासाठी इच्छुकांनी सर्वप्रथम महाडीबीटीच्या अधिकृत संकेतस्थळावर जाऊन प्राथमिक नोंदणी करत स्वतःचा ‘महा आयडी’ (Maha ID) प्राप्त करायचा आहे. त्यानंतर पोर्टलवर लॉग-इन करून वैयक्तिक माहिती भरून आपले प्रोफाइल अद्ययावत करावे लागेल. प्रोफाइल पूर्ण झाल्यानंतर संबंधितांनी ‘Apply for Scheme’ या पर्यायावर जाऊन ‘मुख्यमंत्री मत्स्यसंपदा योजना’ निवडावी आणि आवश्यक कागदपत्रांसह आपला अर्ज सादर करावा, अशी कार्यपद्धती निश्चित करण्यात आली आहे.
दरम्यान, योजनेबाबत सविस्तर माहिती मिळावी तसेच अर्ज भरताना शेतकऱ्यांना व मच्छीमारांना तांत्रिक अडचणी येऊ नयेत, यासाठी मत्स्यव्यवसाय जिल्हा कार्यालयात ‘मुख्यमंत्री मत्स्यसंपदा योजना कक्ष’ स्थापन करण्यात आला आहे. तांत्रिक मदतीसाठी आणि मार्गदर्शनासाठी कार्यालयातील संपर्क अधिकाऱ्यांची नियुक्ती करण्यात आली आहे. जिल्ह्यातील सर्व पात्र मत्स्यव्यवसायिक, मत्स्यशेतकरी आणि मच्छीमारांनी विहित नियमांनुसार आवश्यक कागदपत्रांसह वेळेत ऑनलाइन अर्ज सादर करावेत, असे आवाहन सहायक आयुक्त मत्स्यव्यवसाय कार्यालयामार्फत करण्यात आले आहे.
