सत्ताधाऱ्यांकडून बहुमताची प्रक्रिया अडवण्याचा प्रयत्न; पत्रकारांना वास्तव मांडण्याचे कळकळीचे आवाहन
कोल्हापूर (विशेष प्रतिनिधी):
कोल्हापूर जिल्हा सहकारी दूध उत्पादक संघाच्या (‘गोकुळ’) निवडणुकीत साडेपाच लाख दूध उत्पादक शेतकऱ्यांनी दिलेल्या स्पष्ट बहुमताचा अनादर केला जात असून, तांत्रिक कारणांमागे लपून सहकार व लोकशाहीची गळचेपी केली जात असल्याचा गंभीर आरोप विधान परिषदेतील काँग्रेसचे गटनेते आमदार सतेज (बंटी) डी. पाटील यांनी केला आहे. यासंदर्भात त्यांनी महाराष्ट्रातील सर्व संपादक व पत्रकारांना खुले पत्र लिहून लोकशाही रक्षणासाठी दूध उत्पादक शेतकऱ्यांचा आवाज जनतेसमोर मांडण्याचे आवाहन केले आहे.
आमदार सतेज पाटील यांनी पत्रात म्हटले आहे की, पद्मश्री विठ्ठलराव विखे पाटील, डॉ. धनंजयराव गाडगीळ आणि वैकुंठभाई मेहता यांच्या तत्त्वांवर महाराष्ट्रात उभा राहिलेला सहकार आज संकटात सापडला आहे. शेतकरी हाच संस्थेचा खरा मालक असावा हे स्वप्न मोडीत काढत आज ‘गोकुळ’च्या माध्यमातून सहकाराच्या गाभ्यावरच घाला घातला जात आहे.
ठरवून गैरहजर राहून सभा तहकूब
‘गोकुळ’च्या निवडणुकीत जिल्ह्यातील दूध उत्पादकांनी २५ पैकी १३ जागांवर समविचारी आघाडीला स्पष्ट बहुमत दिले आहे. मात्र, २९ ऑक्टोबर रोजी आयोजित अध्यक्ष निवडीच्या सभेला महायुतीचे सर्व १२ संचालक ठरवून गैरहजर राहिले. त्यामुळे गणपूर्तीअभावी ही सभा तहकूब करावी लागली. पराभव मान्य करण्याऐवजी थेट लोकशाही प्रक्रियाच अडवण्याचा हा अत्यंत निंदनीय प्रकार असल्याचे आमदार पाटील यांनी नमूद केले.
संघटना व कायद्यात फेरबदलाचा डाव?
केवळ बहुमताची गणिते बिघडवण्यासाठी कायदा बदलण्याची किंवा शासननियुक्त संचालकांना मतदानाचा अधिकार देऊन संख्याबळ फिरवण्याची चर्चा सुरू आहे. जर जनतेचा कौल असा तांत्रिक कारणांनी रोखला जाणार असेल, तर मतदानाला काय अर्थ उरतो, असा सवाल त्यांनी उपस्थित केला. आज ‘गोकुळ’मध्ये राबवला गेलेला हाच नियम उद्या महानगरपालिका, नगरपालिका व जिल्हा परिषदांमध्ये आणून स्वीकृत सदस्यांमार्फत लोकशाहीची हत्या केली जाऊ शकते, अशी भीतीही त्यांनी व्यक्त केली.
पुढील सभेला उपस्थित राहण्याचे आवाहन
प्रशासकीय काळात तोटा वाढत असताना आणि दुष्काळ व चाऱ्याच्या प्रश्नांवर निर्णय घेणारे लोकनियुक्त मंडळ अस्तित्वात नसणे हे राज्यासाठी लज्जास्पद आहे. आम्ही कायदेशीर व लोकशाही मार्गाने लढत राहूच; परंतु विरोधी संचालकांनीही शेतकऱ्यांचा कौल मान्य करून पुढील सभेला उपस्थित राहावे, असे आवाहन आमदार पाटील यांनी केले. तसेच सहकाराचा वारसा आणि लोकशाही टिकवण्यासाठी प्रसारमाध्यमांनी या प्रकरणातील वास्तव जनतेसमोर आणावे, अशी विनंती त्यांनी केली आहे.
