सांगली जिल्ह्यात जानेवारी २०२७ मध्ये भव्य ‘महाराष्ट्र इज्तिमा’; लाखो भाविकांची उपस्थिती लाभणार

Shabbir Vasta
2 Min Read

‘स्टार न्यूज़ कोकण’
संपादक : शब्बीर वस्ता
उपसंपादक : नजीरुद्दीन वस्ता

रत्नागिरी (प्रतिनिधी) :
तबलीगी जमातच्या वतीने जानेवारी २०२७ मध्ये सांगली जिल्ह्यातील जत तालुक्यात राज्यस्तरीय भव्य ‘महाराष्ट्र इज्तिमा’ आयोजित करण्यात आला आहे. १५, १६, १७ आणि १८ जानेवारी २०२७ दरम्यान हा चार दिवसीय धार्मिक मेळावा पार पडणार असून, यामध्ये निजामुद्दीन मरकजचे अमीर हजरत जी मौलाना साद साहेब यांचे विशेष मार्गदर्शन (बयान) आणि दुआ होणार आहे. या सोहळ्यासाठी रत्नागिरी व संपूर्ण कोकण विभागातून मोठ्या संख्येने भाविक उपस्थित राहणार आहेत.
भव्य मंडप आणि मूलभूत सुविधांचे नियोजन
जत तालुक्यातील धावडवाडी (प्रतापूर रोड) येथील विस्तीर्ण मैदानावर हा इज्तिमा संपन्न होणार आहे. राज्याच्या कानाकोपऱ्यातून येणाऱ्या लाखो भाविकांच्या आणि जमातींच्या सोयीसाठी सुमारे ६५ लाख चौरस फूट परिसरात भव्य मंडप उभारण्याचे नियोजन सुरू आहे. या ठिकाणी पिण्याच्या पाण्यासाठी स्वतंत्र पाईपलाईन व टँकर, वजूखाना, स्वच्छतागृहे, माफक दरात स्वच्छ भोजन व्यवस्था (मत्बख) आणि वाहनांसाठी प्रशस्त पार्किंग झोन उभारले जात आहेत.
चार दिवसांचे धार्मिक कार्यक्रम
चार दिवस चालणाऱ्या या इज्तिम्यात नियमित नमाज, कुराण पठण, दीनी तालीम आणि हजरत जी मौलाना साद साहेब यांचे विशेष मार्गदर्शन होणार आहे. सोमवार, १८ जानेवारी २०२७ रोजी सकाळी सामूहिक दुआने या भव्य इज्तिम्याची सांगता होईल.
रत्नागिरीतून प्रवासाची आणि राहण्याची सोय
रत्नागिरी ते धावडवाडी (जत) हे अंतर सुमारे २५० ते २६० किलोमीटर असून रस्ता मार्ग सर्वात सोयीचा आहे:
* खाजगी व भाड्याची वाहने: रत्नागिरी – साखरपा – आंबा घाट – कोल्हापूर – सांगली/मिरज – कवठेमहांकाळ – जत – धावडवाडी या मार्गाने सुमारे ५.५ ते ६ तासांत इज्तिमा स्थळी पोहोचता येते.
* एस.टी. बस सेवा: रत्नागिरी आगारातून कोल्हापूर, सांगली व मिरजेसाठी नियमित एस.टी. बसेस उपलब्ध आहेत. तसेच, इज्तिम्याच्या काळात मिरज, सांगली आणि जत स्थानकांवरून थेट इज्तिमा स्थळापर्यंत जादा बसेस सोडल्या जातात.
* निवास व्यवस्था: मुख्य मंडपातच जिल्ह्यानुसार स्वतंत्र विभाग (सेक्टर) निश्चित केले जातात. रत्नागिरी आणि कोकण विभागातील भाविकांसाठी स्वतंत्र निवासाची सोय असेल.
जानेवारी महिन्यात जत परिसरात कडाक्याची थंडी असते, त्यामुळे प्रवासाला निघताना भाविकांनी सोबत गरम कपडे, अंथरूण-पांघरूण आणि आवश्यक औषधे ठेवावीत. अधिक माहितीसाठी आणि जमातीसोबत प्रवासाचे नियोजन करण्यासाठी स्थानिक मशीद किंवा मरकजच्या जबाबदार साथींशी संपर्क साधावा, असे आवाहन करण्यात आले आहे.

Share This Article
Leave a Comment

Leave a Reply

Your email address will not be published. Required fields are marked *