रत्नागिरीत मासेमारी हंगाम संपला! पावसाच्या पार्श्वभूमीवर बोटी किनारपट्टीला; जाळ्यांची आवराआवर करण्यासाठी मच्छीमारांची लगबग

रत्नागिरी:
कोकण किनारपट्टीवर पावसाच्या आगमनाची चाहूल लागताच रत्नागिरीतील प्रसिद्ध आणि गजबजलेला मासेमारी हंगाम आता अधिकृतपणे संपुष्टात आला आहे. उद्या, ३१ मे रोजी चालू मच्छीमारी हंगाम अधिकृतपणे बंद होत असल्याने समुद्रात उसळणाऱ्या लाटा आणि संभाव्य वादळी हवामान लक्षात घेऊन मच्छीमारांनी सुरक्षेचा उपाय म्हणून आपल्या बोटी किनाऱ्याला लावण्यास सुरुवात केली आहे.
जेटी आणि किनाऱ्यावर बोटी सुरक्षित
पावसाळ्यात समुद्रातील धोके टाळण्यासाठी अनेक मच्छीमारी बोटी मिरकरवाडा जेटी तसेच खाडी आणि किनारपट्टीच्या सुरक्षित भागात व्यवस्थित बांधून ठेवण्यात आल्या आहेत. काही लहान आणि मोठ्या बोटी पावसाळ्याच्या ४ महिन्यांत दुरुस्ती (धाग्यासाठी) आणि देखभालीसाठी थेट किनाऱ्यावर (सुक्या भागावर) ओढून ठेवण्यात आल्या आहेत.
खलाशी बांधव आपापल्या गावी रवाना
हंगाम संपल्यामुळे बोटींवर वर्षभर काम करणारा मुख्य कामगार म्हणजेच खलाशी वर्ग आता आपापली मजुरी घेऊन आणि हिशोब पूर्ण करून आपल्या मूळ गावी जाताना दिसत आहे. रत्नागिरीतील मुख्य मच्छीमारी केंद्रांवरून आता परप्रांतीय आणि स्थानिक खलाशांची गावी जाण्यासाठी लगबग सुरू झाली आहे.
चंपक मैदानावरील कातळावर जाळी सुकवण्याची युद्धपातळीवर धावपळ
सध्या रत्नागिरी शहराच्या जवळच असलेल्या प्रसिद्ध चंपक मैदानावरील विस्तीर्ण कातळावर (जांभ्या दगडाच्या पठारावर) एक वेगळेच आणि वैशिष्ट्यपूर्ण चित्र पाहायला मिळत आहे. वर्षभर अथांग समुद्रात मासळी खेचून आणणारी ही अवाढव्य आणि महागडी जाळी सुकविण्यासाठी मच्छीमारांची एकच धावपळ सुरू आहे. भर उन्हामध्ये ही जाळी कातळावर पसरवून नीट सुकवली जात असून, त्यानंतर खलाशी ती व्यवस्थित एकत्र करून मोठ्या ट्रकमध्ये भरत आहेत.
      ही मासेमारीची जाळी अत्यंत महागडी असतात. पावसाच्या पाण्यात ती कुजली किंवा खराब झाली तर लाखो रुपयांचे नुकसान होऊ शकते. त्यामुळे ही जाळी सुरक्षित स्थळी असलेल्या गोदामांमध्ये (Godowns) हलवण्याचे काम सध्या युद्धपातळीवर सुरू आहे.
     पुढील चार महिने आता समुद्रावर संपूर्ण शांतता असेल आणि १ ऑगस्ट रोजी नारळी पौर्णिमेनंतर नव्या उत्साहात आणि नवीन आशेने पारंपरिक पद्धतीने पुन्हा नव्या हंगामाला सुरुवात होईल.