कोकण नगरमधील खड्ड्यांची समस्या सुटली! नगरसेवक केतन शेट्ये आणि सौ. फौजीया मुजावर यांच्या पाठपुराव्याला मोठे यश

रत्नागिरी (विशेष प्रतिनिधी):
प्रभाग क्रमांक ४ मधील कोकण नगर परिसरातील नागरिकांना आणि वाहनचालकांना दिलासा देणारी एक महत्त्वाची बातमी समोर आली आहे. गेल्या काही काळापासून या भागातील रस्त्यांवर पडलेल्या मोठ्या खड्ड्यांमुळे वाहतुकीचा बोजवारा उडाला होता. मात्र, स्थानिक लोकप्रतिनिधींच्या सातत्यपूर्ण पाठपुराव्यामुळे अखेर हे खड्डे बुजविण्याचे काम यशस्वीरित्या पूर्ण करण्यात आले आहे.
     प्रभाग क्रमांक ४ चे कार्यतत्पर नगरसेवक केतन उमेश शेट्ये आणि नगरसेविका सौ. फौजीया तन्वीर मुजावर यांनी या समस्येची गंभीर दखल घेतली होती. कोकण नगर परिसरातील रस्त्यांच्या दुरवस्थेमुळे पादचारी आणि वाहनचालकांना नाहक त्रासाला सामोरे जावे लागत होते, तसेच अपघातांचा धोकाही वाढला होता. स्थानिक नागरिकांनी यासंदर्भात लोकप्रतिनिधींकडे तक्रारी व मागण्या मांडल्या होत्या.
     नागरिकांच्या या समस्येचे निवारण करण्यासाठी नगरसेवक केतन शेट्ये आणि नगरसेविका फौजीया मुजावर यांनी संबंधित प्रशासकीय विभागाकडे सातत्याने आणि आक्रमकपणे पाठपुरावा केला. त्यांच्या या प्रयत्नांना यश आले असून, प्रशासनाने तातडीने पावले उचलत कोकण नगरमधील खड्डे बुजविण्याचे काम मार्गी लावले.
      खड्डे बुजविण्यात आल्यामुळे आता या भागातील रस्ते वाहतुकीसाठी अधिक सुरक्षित आणि सुळसुळीत झाले आहेत. यामुळे स्थानिक नागरिक, चाकरमानी आणि वाहनधारकांनी सुटकेचा श्वास सोडला आहे. प्रभागातील प्रलंबित प्रश्न मार्गी लावल्याबद्दल कोकण नगरमधील नागरिकांनी समाधान व्यक्त करत दोन्ही लोकप्रतिनिधींचे मनापासून आभार मानले आहेत.
    “आपल्या प्रभागातील नागरिकांना कोणत्याही मूलभूत सुविधांपासून वंचित राहावे लागू नये, हाच आमचा प्रामाणिक प्रयत्न आहे. खड्ड्यांचा प्रश्न गंभीर होता, तो मार्गी लागला आहे. यापुढेही प्रभागातील रस्ते, पाणी, वीज आणि इतर पायाभूत सुविधांचा विकास करण्यासाठी आम्ही दोघेही कटिबद्ध आणि सदैव प्रयत्नशील राहू.” नगरसेवक केतन शेट्ये आणि नगरसेविका फोजिया मुजावर यांनी सांगितले.