कोकण रेल्वेवर प्रवाशांच्या काळजाचा ठोका चुकला! आरवली बोगद्यात ‘दिवा-सावंतवाडी’ एक्सप्रेसच्या काचा फुटल्या; डब्यात उडाला हाहाकार

रत्नागिरी/संगमेश्वर:
कोकण रेल्वे मार्गावरील आरवली बोगद्यात एक अत्यंत धक्कादायक आणि प्रवाशांचा थरकाप उडवणारी घटना घडली आहे. मुंबईहून रत्नागिरीच्या दिशेने येणाऱ्या ‘दिवा-सावंतवाडी’ एक्सप्रेसच्या दोन डब्यांच्या काचा बोगद्यात अचानक फुटल्याने प्रवाशांमध्ये प्रचंड गोंधळ आणि भीतीचे वातावरण निर्माण झाले होते. सुदैवाने या घटनेत कोणतीही जीवितहानी किंवा दुखापत झालेली नाही, मात्र अचानक झालेल्या या प्रकारामुळे प्रवाशांची मोठी धावपळ उडाली.
     मिळालेल्या माहितीनुसार, मुंबईकडून येणारी दिवा-सावंतवाडी ट्रेन बुधवारी दुपारी दोन वाजण्याच्या सुमारास आरवली स्थानकापूर्वी असलेल्या बोगद्यातून मार्गक्रमण करत होती. गाडी नेहमीप्रमाणे वेगात असतानाच बोगद्याच्या अंधारात अचानक एक प्रचंड मोठा आवाज झाला.
हा प्रकार गाडीच्या पाचव्या आणि सातव्या जनरल डब्यात घडला. या भयानक आवाजामुळे पाचव्या डब्यात खिडकीजवळ बसलेली एक महिला प्रवासी घाबरून अचानक ओरडली. या अचानक उद्भवलेल्या परिस्थितीमुळे संपूर्ण डब्यात एकच हाहाकार उडाला आणि भयभीत झालेल्या प्रवाशांची मोठी पळापळ सुरू झाली. खिडकीच्या काचा फुटून त्याचे तुकडे थेट डब्यात उडाले होते.
     घटनेचे गांभीर्य ओळखून रेल्वे प्रशासनाने तातडीने पावले उचलली. गाडी तातडीने पुढील आरवली स्थानकावर सुमारे १५ मिनिटांसाठी थांबवण्यात आली. रेल्वेचे कर्मचारी आणि कामगार तात्काळ डब्यांमध्ये पोहोचले. त्यांनी डब्यात विखुरलेले काचेचे सर्व तुकडे गोळा करून डब्यांची कसून स्वच्छता केली. प्रवाशांची सुरक्षा निश्चित केल्यानंतरच गाडी पुढील प्रवासासाठी मार्गस्थ करण्यात आली. पुढील स्टेशनवरही रेल्वे कर्मचाऱ्यांनी पुन्हा डब्यात येऊन पाहणी केली.
     बोगद्यामध्ये रेल्वेच्या खिडकीवर नक्की काय आदळले, याबाबत प्रवाशांमध्ये विविध चर्चा सुरू होत्या. मात्र, रेल्वे प्रशासनाकडून मिळालेल्या अधिकृत माहितीनुसार:
बोगद्यामध्ये गाडी आली असताना सेंट्रिंगचा एक लोखंडी पार्ट गाडीच्या खिडकीच्या काचेवर आदळला. या जोरदार धडकेमुळे काच फुटली आणि मोठा आवाज झाला होता.
     या प्रकारानंतर कोकण रेल्वे प्रशासनाने तात्काळ सर्व पाहणी केली असून सुरक्षेविषयी आवश्यक त्या सर्व उपाययोजना करण्यात आल्या आहेत, अशी माहिती ‘कोरे’ प्रशासनाकडून देण्यात आली आहे. या घटनेला कोकण रेल्वेनेही दुजोरा दिला आहे.